español | awajún | tikuna | kichwa

Iinia aénts weantu batsatkamu Pirú nugkanmaya Amazonía tawa nuwiya aidau

©FORMABIAP

Pirú nugkanum Amazonía tawa nuwi batsatainaiwai iiya junin weantu aidau wej tunui iman iinia aents aidau, maki makichik dita chichamen chichaka antugdaiyak pujú ainawai. Jujú chicham aidau ijundaiyainawai tunui wej iman aentsnum. Nuigtush ima chichamegkechui, nugkeshkam ajuinawai, dita weantujain ijunag pujutan dekainawai, juni batsamtan unuimaju ainawai megkaekain tabaunum, nuigtush antugdayak batsamsatan tabaunum . Ashi dekagnaikau ainawai ditash wajuku ainawa, nuniak pujutinak ima ditak dekagnainawai. Chichamen pujuti betekchau ainakush duka ditaig utugchatchauwai betekmagtin pujuti asag, junin asag dita akinamujin betekmamtin asag atunik chichamjunik batsamin ainawai, nuniak dita pujutin yapajia takas batsamin ainawai nuniau asa senchi chichamjunin ainawai nuu nugkanmag ikam batsamin asag. Jujú ijunja pujaku unuimagbauwai duwi takanui ashi ijunja iina kakagmaji , iina muunji pujut, takat aidau, agat aidau aatus ayamjuttasa juka takatak minawai iina muunji yaunchuk batsamas dukap mijan batsamas atsumamujin umika takas midiaju ainawai duwi yachameaju ainawai ikamnumash wajuk antugdaika batsamainita, wajuk aentstish ijunjaya chichasa batsamainita junika batsamas shiig aneas takasa pujusu ainawai juwi dekau ainawai wajukeakua tsawantash, waji aidaush yapajinua. Nuigtush dukap ainaji ikam nugkanum tuke batsamin aidautik iina muujin junik batsamas dita unuimagbaujin uchijin jintintua miniaju ainawai.

Dita atsumamujin inagkeak tuke batsamsatag tabaunum juti aents weantu anin aidautik, muun aidaun, uchi tsakat, datsaush aidaun jintintua miniu ainawai imatikamu asa iina pujuti pegkeg aina duka etsegkamu iwainakbau amainai ashi nugkanum tikich aents batsata dushakam unuimaju agti tabaunum.